Tratamentos

De Manual de Estilo DOG

Revisión como estaba o 21 de xuño de 2012 ás 07:49

A Lei 4/2006, do 30 de xuño, de transparencia e de boas prácticas na Administración pública galega (DOG núm. 136, do 14 de xullo), dispón, no artigo 18. Tratamentos, o seguinte: «O tratamento oficial dos membros do Goberno e dos altos cargos será o de señor/señora, seguido da denominación do cargo, emprego ou rango corrrespondente».

Na redacción do DOG, as referencias aos cargos non se marcan con ningún tratamento. Estes son os contextos máis habituais:

• Polo xeral, os cargos non aparecen acompañados do nome propio que os representa: A conselleira de Facenda resolveu...; O recurso pode presentarse ante o director xeral da Función Pública ...

• Nas sinaturas tampouco se emprega ningunha forma de tratamento; cítase o nome propio da persoa que exerce o cargo e, a seguir, o cargo que desempeña:

Agustín Hernández Fernández de Rojas

Conselleiro de Medio Ambiente, Territorio

e Infraestruturas

En canto ao tratamento do resto de persoas, os criterios son os seguintes:

• Cando as persoas son citadas só polos seus apelidos, por exemplo en sentenzas e textos semellantes, a fórmula de tratamento introdutoria é a de señor/señora. Esta fórmula é a adecuada para referirse ao persoal da avogacía, a xudicatura e a procuradoría: [...] representada polo procurador señor Pedreira (...) e asistida pola letrada señora Méndez [...]

• A forma de tratamento don/dona resérvase para introducir o nome completo en modelos de solicitude ou semellantes: Don/Dona......, con DNI....., DECLARO:

• Polo demais, cando as persoas son citadas polo seu nome e apelidos, non se introduce ningún tratamento: cítase a Carme Pousa Galego para que compareza...